Beschreibung
Ds Buurebüebli im Zug z Irland, dr Bärnermutz am Flughafe z Amsterdam oder Chünizer Brombeeri ir Toscana: Üsi Autorin het uf ihrne vilne Reise, wo si privat u brueflech het underno, mängs erläbt - Kurioses, Luschtigs u Dänkwürdigs. Geng wider isch es o dr Zuefall gsy, wo si a interessanti Orte u zu bsundere Mönsche gfüehrt het. Ihrer Erinnerige sy ihre Schatz, wo si gärn mit üs teilt.
Produktsicherheitsverordnung
Hersteller:
Blaukreuz Bern c/o MOSAICSTONES Verlag & Buchhandel
bestellung@chrismedia24.de
Karl-Koch-Str. 12e
CH 3600 THUN
Autorenportrait
Si isch ä ächti Bärnere d'Madeleine Jaggi. Z'Bärn gebore, z'Chüniz ufgwachse u id Schuel gange u jetze dert wieder deheime. Sit 54 Jahr isch si mit em Ruedi verhüratet u si hei zäme ä Suhn u ä Tochter, ä Schwiegertochter us Peru u ä Schwiegersuhn us Frankrich. Zur glückliche Familie ghöre ou siebe Grossching u eis Urgrossching - vier Meitschi u vier Buebe.
Leseprobe
Underwägs dörfe z si isch doch eifach äs Gschänk. Mit üsem VW Chäfer si mir underwägs gsi uf Italie. Zersch dür ds Oberland uf, de übere Brünig Richtig Innerschwiiz. Dr Gotthardpass z düruf u d Tremola z dürab ids Tessin. I üsere unnestube wos denn grägnet het was der Himmel het chönne usläre, hei mir im Hotel übernachtet. Im Chäfer hets zwar äs Zält u di ganzi Usrüschtig gha, ou mit emene Chocher für eis Pfänni. Aber äbe, im Tessin mit so viel Räge u Nessi, hei mir üs ds ugmüetleche Übernachte im Zält wölle erspare. Am nächschte Morge isch äs witergange Richtig Meer u Süüde. Ufemene schöne Zältplatz imene chline Stedtli ar Riviera, hei mir üses Zält ufgschlage. D Sicht id d Wiiti u uf ds Meer isch würklech grandios gsi. Äs isch Herbscht gsi u der Platz nümme so überfüllt wie sicher albe im Summer. Dr Ruedi het um ds Zält ume no äs chlises Gräbli mit emene Abfluss ids Gebüsch grabet. Mi weiss ja nie, het är gmeint. Wenns de hie afat rägne, de rägnets de richtig u ig möchti im Zält kener Glungge ha. Ä stahlbblaue Himmel mit äs paar vorwitzige chline wisse Wülchli, äs liechts Lüftli, eifach farbigs früschs Herbschtwätter hei mir dörfe gniesse. Mir si tagsüber underwägs gsi, hei d Umgäbig erkundet, si im warme Meer ga schwümme u hei am Abe imene chline Beizli di feinschte Spaghetti gässe u gnosse. Wenn äs het ignachtet, si mir mit emene Teeli u feine italiänische Güetzi vor em Zält gsässe. Mir hei ds ruusche vom Meer ghört u di viile Stärne am Himmel bestuunet. Äs si wunderschöni Äbe gsi.
